Rev 17 | WSK | STEP | Se engel 7 taiwir 7 ilu se animan mu nunga ningi bo aningate tairam ale balam, “Tair se ani lage luan imet ikup aromemek taukko negawoso wore ka kausek se arikko. Nu yu suen biya duap te daigam bagoso.

Revelation of John 17

Lage luan imet Babylon memek tam

1 Se engel 7 taiwir 7 ilu se animan mu nunga ningi bo aningate tairam ale balam, “Tair se ani lage luan imet ikup aromemek taukko negawoso wore ka kausek se arikko. Nu yu suen biya duap te daigam bagoso. ^{▼▼Rev 17:1 Babylon: Chapter imi ko verse 15 arikko. Ale Rev 14:8 ko sinar den lete nukum te aniso mu ago arikko.} 2 Ali sor supuling alo imet mu ilak saman katagot bitakasan. Se ali imi ko kariimet betela noko saman katagot ko munan mu waen iwita naman ale nguala muruwuman.”

3 Se Korang Bur sail ago aga iram se engel umutang aga giam ale sor kariimet mena mu te agarak nama arataman. Se sor mu te ani imet bo mel diwang bo diriyam mu awete dagiwaram se arigem. Mel diwang mu ko kumik te mu nup duap duap anikaso, se nup mu Kaem balu maguwura ko nup. Mel diwang mu ko supuling 7, se ko dinak mu 10. ^{▼▼Rev 17:3 Imet Babylon mu mel diwang awete dagiwaram: Rev 13:1.} 4 Se imet guang kataram mu bo diriyam, se bo gue muguri iwita. Ale bala mel duap duap kumik te anikaso, gold, se manga gotektek nikinang ago ningo ningo, se manga gotektek siraram palepalengam, mel imitang ko koma kalel biya. Nu bagunang gold te nunga mu iluwakaso. Se bagunang mu ningi mu melmasak karur ago, se siring kapawara, mu kuring aratam, umutang noko saman katagot ko mel. 5 Ko moke sail te ko nup batagorman se anikaso, mu den ira te, se mu iwita:

WONONG BIYA BABYLON, LAGE LUAN IMET SUEN LA NUNGA NUNAM, ALE ALI IMI KO KILEK MEMEK SUEN LA KO DUAP

6 Imet mu ngualakaso se arigem. Mu awuk, nu Kaem ko kariimet, se kariimet Jesus ko nongomang ningi nunguning aram se ko dugu duap balukasan, mu nunga gue nam ale ngualakaso. Se ani nu arigem ale ninguru biririkirem, ale ikia aga moakaso.

7 Se engel aga isuam, “Ni anape ko biririkirem ale ikia ka moso? Ani imet mu se, mel diwang ko supuling 7 se ko dinak 10 nu awete dagiwoso, mu nunga duap yumura te aniram mu aitak balik se ni ikiko. 8 Mel diwang ni arigem imi mu ulengkala bagakaso, bare aitak mu mena. Bare nu mutim du biya mu bitiruk ale tarigi aratuk ale nama memek taukko. Kaem ali me nungurukaso la, nu kariimet saki nunga balam, tom suen biya ilak bagomonko mam, ale nunga nunup ko batoga te bataguru beteram se aniso. Bare kariimet saki nunga nunup batoga mu te mena, mu nuna mel diwang aringimon ale ninguru biririkimonko. Mu awuk, nu ulengkala bagakaso, ale aitak me bagoso, bare udagi te aratukko.

9 “Ni ikia karogo mu mel imi ko ikiko. Mel diwang ko supuling 7 umutang mu duruk 7 tala lage luan imet awete dagiwoso wore ko balso. ^{▼▼Rev 17:9 Duruk ko balso mu wonong ali sor sokel ago wore nunga balso.} Ale betela supuling 7 umutang mu ali sor supuling 7 tala nunga balso. 10 Se 5 mu maingkala dagulaman, bo bagoso, se bo me aratoso, aitak. Bare aratuk mu tom katirta ko bagurukko. 11 Se mel diwang ulengkala bagakaso, ale aitak me bagoso, mu ali sor supuling number 8 wore ko balso. Bare nu ali sor supuling 7 mu nunga bo, se maingte nama memek taukko.

12 “Se dinak 10 ni arigem umutang mu ali sor supuling 10 wore nunga balso. ^{▼▼Rev 17:12 Dinak 10: Daniel 7:23-27. Kari Biya Jesus nunga kiarukko: Rev 19:11-16, 19-21.} Bare nuna ali sor bitarmonko me aratasan, aitak. Bare nuna sokel tamon, ale mel diwang mu ilak tom tukunangta ko ali sor bitarmonko. 13 Ali sor supuling 10 imi mu nunga ikia koma suwanta: nuna nongota nunga nosokel, nunga nunup bibiya karogo, se mel umu kututuwu mel diwang mu tumon se nu te ura bitirukko. 14 Nuna Sipsip Gotek ilak kagermonko. Bare Sipsip Gotek mu nunga kiarukko. Mu awuk, nu kari bibiya suen la nunga Kari Biya, nu ali supuling suen la nunga Supuling. Se kariimet nu nunga auram, ale aninga ma nunga balam, se nu kowom karo gilingisan, mu nu ilak ta kager kari umutang nunga kiamonko.”

15 Asele engel mu aking aga maonam, “Yu suen biya lage luan imet duap te dagiwaram se arigem, umutang mu ali sor suen biya ko kariimet, nunga nungumik kirker, nunga den kirker wore nunga balso. 16 Se mel diwang, se ko dinak 10 ni arigem umutang mu lage luan imet ko nongomang maguruk se ilak kagermonko. Nuna ninguru moa maguwumon, ale ko guang kututuwu warmon se nunguning la bagurukko. Ale nuna ko kumik nunguning namon ale ko sokelel tama te kaimonko. ^{▼▼Rev 17:16-18 Mel diwang se ko sikisaki mu Babylon ko nongomang maguruk se memek taukko: Rev 18:8.} 17 Mu awuk, Kaem mu ikia nongomang te bitiruk, se mel nu giram ko balam umutang betemon se aratukko. Nuna nongomang suwan awumon, ale nunga sokel ali sor te bitarmonko mu suen la mel diwang mu tumonko. Se nu te sor bituok nama, Kaem ko den suen biya ko balam mu ko nunguning suen la aratu sapuruk asele nononga tom menarukko. Se lage luan imet ni arigem umu mu wonong biya, nu ali sor supuling suen la nunga supuling ko baga se nunga bitarso.”

18